တတိယအကြိမ်စစ်ကိုင်းတိုင်းဒေသကြီးလွှတ်တော် တတိယပုံမှန်အစည်းအဝေးပဥ္စမနေ့ကို ယနေ့ နံနက်ပိုင်းက စစ်ကိုင်းတိုင်းဒေသကြီးမုံရွာမြို့လွှတ်ေတာ်အဆောက်အအုံရှိလွှတ်တော် အစည်းအဝေးခန်းမ၌ ကျင်းပသည်။
အစည်းအဝေးတွင် စစ်ကိုင်းတိုင်းဒေသကြီး လွှတ်တော်ဥက္ကဋ္ဌ ဦးတင့်လှိုင်မြင့်က တတိယအကြိမ် စစ်ကိုင်းတိုင်းဒေသကြီးလွှတ်တော် တတိယပုံမှန်အစည်းအဝေး ပဥ္စမနေ့သို့ တက်ရောက်ခွင့်ရှိသည့် လွှတ်တော်ကိုယ်စားလှယ်ဦးရေ စုစုပေါင်း ၈၄ ဦး ရှိသည့်အနက် ယနေ့အစည်းအဝေးသို ၇၇ ဦး တက်ရောက်သဖြင့် သုံးပုံတစ်ပုံကျော်သည့်အတွက် အစည်းအဝေးအထမြောက်ကြောင်းနှင့် စတင်ကျင်းပကြောင်း ကြေညာကာ အစည်းအဝေးတက်ရောက်မှုအခြေအနေကို လွှတ်တော်၏ အတည်ပြုချက်ရယူ၍ မှတ်တမ်းတင်သည်။
ယင်းနောက် ကြယ်ပွင့်ပြထားသည့် မေးခွန်း(၁၁)ခုကို လွှတ်တော်ကိုယ်စားလှယ်(၁၀)ဦးကမေးမြန်းကြရာ သက်ဆိုင်ရာတိုင်းဒေသကြီးအဆင့် အဖွဲ့အစည်းဝင် ဝန်ကြီးများက ဖြေကြားခဲ့ကြသည်။
ဆက်လက်၍ ယင်းမာပင်မြို့နယ်မဲဆန္ဒနယ်အမှတ်(၂)မှ ဦးကျော်နိုင်ဝင်း က "မူးယစ်ဆေးဝါး အန္တရာယ် တားဆီးကာကွယ်ရေး၊ လူငယ်များ၏ အနာဂတ်လုံခြုံရေးနှင့် လူမှုအသိုင်း အဝိုင်း၏ တည်ငြိမ်အေးချမ်းရေးအတွက် ထိရောက်သောအစီအစဉ်များ အကောင်အထည်ဖော်ဆောင်ရွက်ပေးနိုင်ရေး တိုက်တွန်းကြောင်း" အဆိုတင်သွင်းပြီး ကလေးဝမြို့နယ်မဲဆန္ဒနယ်အမှတ် (၂)မှ ဦးရဲနောင်က ထောက်ခံဆွေးနွေးသည်။
ယင်းနောက် လွှတ်တော်ဥက္ကဌက ယင်းမာပင်မြိုနယ်မဲဆန္ဒနယ် အမှတ်(၂)မှ ဦးကျော်နိုင်ဝင်း ၏ "မူးယစ်ဆေးဝါး အန္တရာယ် တားဆီးကာကွယ်ရေး၊ လူငယ်များ၏ အနာဂတ်လုံခြုံရေးနှင့် လူမှုအသိုင်း အဝိုင်း၏ တည်ငြိမ်အေးချမ်းရေးအတွက် ထိရောက်သောအစီအစဉ်များ အကောင်အထည်ဖော် ဆောင်ရွက်ပေးနိုင်ရေး တိုက်တွန်းကြောင်း" အဆိုနှင့်စပ်လျဉ်း၍ လက်ခံဆွေးနွေးရန် သင့်/မသင့် လွှတ်တော်၏အဆုံးအဖြတ် ရယူရာ လွှတ်တော်ကသဘောတူညီသည့်အတွက် ဆွေးနွေးလိုသည့်လွှတ်တော်ကိုယ်စားလှယ်များရှိပါက (၁၄-၈-၂၀၂၆)ရက်နေ့ ညနေ (၁၅၃၀)နာရီအရောက်လွှတ်တော်ရုံးအကြီးအမှူးထံ အမည်စာရင်း တင်သွင်းနိုင်ကြောင်းကြေညာသည်။
ထို့နောက် စစ်ကိုင်းတိုင်းဒေသကြီး လွှတ်တော် တတိယပုံမှန်အစည်းအဝေး ပဉ္စမနေ့ ရပ်နားကြောင်းနှင့် အစည်းအဝေး ဆဌမနေ့ကို ဩဂုတ်လ (၁၄)ရက်နေ့ နံနက် (၁၀)နာရီတွင် ဆက်လက်ကျင်းပမည် ဖြစ်ကြောင်း ကြေညာခဲ့သည်။
